Ratna Shamser Thapa

१)
नाङ्गिदै छन्,
हिउँको अभावमा
हिमालहरू ।

२)
लोप हुँदैछ
सौन्दर्य पहाडको
नापाई स्नेह ।

३)
मख्ख पर्दैछन्
लहरको स्पर्शमा
किनाराहरू ।

४)
अोसिहो धर्ती
निठुरी मौसमले
बदल्दा रङ ।

५)
खोज्दैछन् वास्ना
कागजको फूलमा
अल्लारेहरू ।

६)
को सुन्छ यहाँ
खोला नदीहरूको
तीतो गुनासो ।

-रत्नशमशेर थापा

मौनतालाई टुक्राइदिने सुसेल ए आँधी
भैँचालोले खोलोस् आँखा भाँचेर समाधि ।
आगोको तातो असिना खन्या बादल कुर्लेर
क्षितिज चिर्ने आवाज सुना सागर उर्लेर

कुल्ची हिंड हाँसी-हाँसी यो छाती तिम्रै बाटो हो
मेरो देह त केही होइन केवल एक थुप्रो माटो हो
गालाको पाटाको लामो धर्सो त्यो घाउ होइन
त्यो त झरी सुकेको आँसुको एक थोपा टाटो हो !