यी बाटाहरूमा/ रेनुका भट्ट

Your rating: None Average: 5 (3 votes)

बनाउनेले बाटो

टेकेर कहिल्यै त्यहाँ हिँड्न पाएनन्

हिँड्नेहरूले कहिल्यै आफैँ बाटो बनाएनन् ।

आफ्नै बलियो मेरुदण्डझैँ

हाम्रा बाबुबाजेले निर्माण गरेका बाटाहरू टेकेर

हिँडिरहे राजा-महाराजा र ठूल्ठूला शासकहरू

जंगलतिर सिकार हान्न, र, गाउँ-गाउँ सुसारे युवती खोज्न

अथवा गौँडा र कुमारी चोकतिर

रैतीहरूको तीरो असुल्न, तिनीहरू कसरी पुग्थे

हाम्रा पुर्खाले नखनेका भए बाटाहरू ।

पटक-पटक हाम्रा पुर्खाले खने मात्र

तर, सुखको भारी बोकेर आफैँ

नाच्दै गाउँदै कहिल्यै हिँड्न पाएनन्

टेक्न पाएनन् आफ्नै पसिनाले भिजेको बाटामा ।

हामी पनि खनिरहेका छौँ नयाँ बाटाहरू

को-को हिँड्लान् हामीले खनेका बाटाहरूमा ?

खेतबारी जोत्ने किसान कि गाउँका मुखियाहरू ?

मायालु जोडीहरू कि कसैलाई लुट्न हिँडेका डाँकाहरू ?

तीरो तिर्ने जनता कि भ्रष्ट सरकारी हाकिमहरू ?

गाउँ फर्किरहेका लाहुरेहरू कि अरब हिँडेका लेबरहरू ?

आन्दोलनलाई ठोक्ने बुट-लाठीहरू कि इन्क्लाबी जुलुस ?

को-को हिँड्लान् हामीले खन्दै गरेका नयाँ बाटाहरूमा ?

[First published in Nepal Weekly]

Author: 
Segments: 

Comments

Recent Comments

About Online Sahitya


Online Sahitya is an open digital library of Nepali Literature | Criticism, Essay, Ghazal, Haiku, Memoir, Personality, Muktak, News, Play, Poem, Preface, Song, Story, Translation & more

© Online Sahitya Digital Library, All rights reserved. Online Sahitya is a digital library dedicated to Nepali Art and Nepali Literature.
For further details contact: onlinesahitya@gmail.com.