Bhimdarshan Roka

Himal Bolaunchha / Bhimdarshan Roka

हिमाल बोलाउँछ / भीमदर्शन रोका

प्रिय !
जाऊँ हिँड त्यो ठाउँमा
जहाँबाट छर्लङ्ग देखिन्छ हिमाल
र शुरु हुन्छ यसको सीमाना 
त्यहाँसम्म आई खोजिरहन्छ
तिमीलाई, मलाई र हामीजस्ता कैयौँ कैयौँलाई !

सङ्लो, सङ्लो
शुभ्र, स्निग्ध
बसिरहेको......... उठिरहेको
आफ्ना चुली आफै पार गरी गरी
सयौँ पर्वतसम्म गएको
ऐनैऐनाको स्निग्ध हेराइमा
बोलाउँछ
आफूले आफूलाई हेर्न
तिमीलाई, मलाई र हामीजस्ता कैयौँ कैयौँलाई !
Segments

Char Tukra / Bhim Darshan Roka

चार टुक्रा / भीमदर्शन रोका

ताराहरुको आकाश बोलाउँछ मलाई,
यो कति टाढाको आश बोलाउँछ मलाई,
कहिल्यै पनि नफक्रिएको
कलि कलिको सुवास आउँछ मलाई ।

हृदयले आफूसँग राख्दछ मलाई,
बचपन बारबार छोई भाग्दछ मलाई,
जसलाई पनि हेर्दछु म
उसैले आई समात्छ मलाई ।

पिउँछु, पिउने मेरो बानी छ;
मस्त छु मग्न छु, बेहोसी मेरो कहानी छ; 
जो लुटिएका छन् आउनू नजिक मेरो 
कि जवान छु र जवानी छ ।
Segments

Dhalmal Dhalmal Gari / Bhim Darshan Roka

ढल्मल ढल्मल गरी / भीमदर्शन रोका

ढल्मल ढल्मल गरी
सेता सेता बादलसरी
मलाई आकाशतिर जान नदेऊ
मेरोआफ्नै धरती छाडी ।

कहिले प्रयास गरेँ भने पनि
उँचा उडान भरेँ भने पनि
तिमी मलाई हावाले हान्नू
पानी पार्नू, आसिना पार्नू

बिजुली–चुल्ठीले बाटो छेक्नू
तल मेरै धरतीमा फ्याँक्नू
ढल्मल ढल्मल गरी
आकाशतिर जान नदेऊ ।

Dhunga Rakhe Jalma TImile / Bhimdarshan Roka

डुङ्गा राखे जलमा तिमीले / भीमदर्शन रोका

डुङ्गा राखे जलमा तिमीले
हातको पतवार दिउँला ।

उत्थान—पतनको माझमा
तूफानको किनार दिउँला ।

डुङ्गा अढ्यो भने कतै
लहरको पर्दा उघार दिउँला ।

दाउ हान्न नै आए मसँग
आफ्नो सवकुछ हार दिउँला ।
Segments

Eklai Eklai Udas Chhu Ma / Bhim Darshan Roka

एक्लै एक्लै उदास उदास छु म / भीमदर्शन रोका

एक्लै एक्लै उदास उदास छु म
घाम डुबी तारा नउदाएको आकाश हुँ म
हिजो जहाँ आई बसेथिन् तिनी
त्यही उजडिसकेको बास हुँ म

एक्लै एक्लै उदास उदास छु म ।

कोही नदी किनार हुँ म
सधैँ पर्खिरहने प्यार हुँ म
कतैदेखि टाढा भएपनि
कतैदेखि बिल्कुल पास छु म

एकलै एक्लै उदास उदास छु म ।

Ae Raat, Ae Din, Roka, Roka / Bhim Darshan Roka

ए रात, ए दिन, रोक, रोक / भीमदर्शन रोका

भीडैभीडले छोपेको, देखिन्न बाहिर
यो कहाँ हो, आइपुगेँ कहाँनिर
यसले कता पुर्‍याउन लाग्यो
अघि देखेको ठाउँजस्तो लाग्यो
बाटो एकदम फरक लाग्यो
चक्रपथझैँ घुमिरहेको
ए रात, ए दिन, रोक ! रोक !
म यहीँ ओर्लन्छु
गल्तीले यसमा बसेछु
कुन सुरमा चढेछु ।

अलि ढिलो भयो
बिहान रित्तै गयो
रित्तै भए पनि पुगिसकेको होला
म भरिदिन्थेँ
म पुग्न आएको थिएँ

Ek Yug Bhayo / Bhim Darshan Roka

एक युग भयो / भीमदर्शन रोका

एक युग भयो, छाडेर घर
म यात्री गर्न एक्लै सफर
हिँडिरहेछु, साथी ! म हिँडिरहेछु
आरम्भ छाडी अन्तदेखि बेखर !

एक युग भयो...

सधैँ बिहान हिँड्न थाल्दछु म
सधैँ साँझ, ताराहरु बाल्दछु म
सधैँ दिनको एकै अन्त देख्दा
किन हो किन लाग्दछ डर ?

एक युग भयो...
Segments

Phewatal / Bhim Darshan Roka

फेवाताल / भीमदर्शन रोका

पर्खिरहनू त्यो वनको किनारमा
मैरै प्रतीक्षा, मेरै विचारमा
फिँजाई थकिँदो आँचल आफ्नो
त्यो वनको छायाँको भारमा ।

बादलको सेतो डुङ्गा तर्छ यहाँ—
हिउँलाई बोकी हिमाल झर्छ यहाँ
पग्लन्छन् किरणहरु जताततै
घामले आफूलाई जब छर्छ यहाँ ।

हावाले पानीलाई तास्दछ यहाँ
लहर लहर आपसमा मिल्दछ यहाँ
हल्लाइदिन्छ हृदय मेरो—
गहिरो आकाश पनि हल्लिन्छ यहाँ ।
Segments

Barshat / Bheem Darshan Roka

बर्सात / भीमदर्शन रोका

मेरो ऋतु बर्सात आयो
इन्द्रेनीमा रङ्ग सात आयो
किन नदगुरुँ पोल्टो थापी
दूर देशको सौगात आयो ।

मेरो ऋतु बर्सात आयो
इन्द्रेनीमा रङ्ग सात आयो ।

किन न जोड जोडले बोलूँ
उकुस–मुकुस यो हृदय खोलूँ
झरझर झरझरको स्वरले
सबैको स्वर सात डुबायो ।

मेरो ऋतु बर्सात आयो
इन्द्रेनीमा रङ्ग सात आयो ।
Segments