Loading

सम्झनाका छायाँहरू/ खगेन्द्र गिरी 'कोपिला'

सम्झनाका छायाँहरू सम्झिर'न पाए पुग्यो
जूनकीरीझैँ अँधेरीमा चम्किर'न पाए पुग्यो

सँगालेर पीडाहरू अँगालेर खुसीहरू
हृदयको गोरेटोमा लम्किर'न पाए पुग्यो

मनको भाखा दिलको लय शब्दबाट पोखिएर
सुस्केरा र सुसेलीमा घन्किर'न पाए पुग्यो

कोट्याएर आफ्नै घाउ बल्झाएर आफ्नै व्यथा
परेलीमा कैलेकाहीँ छल्किर'न पाए पुग्यो

सम्झिएर हिमाल, पहाड सम्झिएर तराईं मधेस
नेपाली भै पटकपटक, जन्मिर'न पाए पुग्यो ।

[First published in Madhuparka monthly]

Segments: 

Comments