Loading

हामीबीचमै कोही दुश्मन लुकिरहेको हुन सक्छ / जोतारे धाइबा

हामीबीचमै कोही दुश्मन लुकिरहेको हुन सक्छ
क्रान्तिको चेपतिर भजन लुकिरहेको हुन सक्छ ।

सबैतिर अमनचैन छ भनेर झुक्याउलान् उनीहरू,
कुना-कन्दरामा अझै जलन लुकिरहेको हुन सक्छ ।

लडाइँ लड्छु भन्नेले आँखा तिखो नपारी कहाँ हुन्छ,
पाइलैपिच्छे बाधा अड्चन लुकिरहेको हुन सक्छ ।

कमाएर खोइ पठाएन फर्किएर आफू आएन,
ल्हासामा बिखर्ची मदन लुकिरहेको हुन सक्छ ।

पागल हो भनेर कति पो पन्छाउने हो उसलाई,
सुन त, बोलीपिच्छे दर्शन लुकिरहेको हुन सक्छ ।

Segments: 
Author: 

Comments