Loading

मलाई सङ्गिनी, सेलो, र त्यो ख्याली भए पुग्छ

मलाई सङ्गिनी, सेलो, र त्यो ख्याली भए पुग्छ
सधैँ बग्ने त्यही मेची, महाकाली भए पुग्छ

मलाई गुन्द्रुकै साँधी, ढिँडो चोपेर खाएको
पुरानो बाउबाजेको, कुनै थाली भए पुग्छ

महङ्गा चोक, अट्टाली, घुमेँ धेरै भएँ दिक्क
म रम्ने गाउँमा खर् को, उही पाली भए पुग्छ

किसानैको हुँदा छोरो, सकेसम्मन् मलाई त
हलो, लिङ्गो, जुवा, नारा, अनौ, फाली भए पुग्छ

पराईको झुठो माया, र त्यो आश्वासनै भन्दा
कुनै आफन्तको मीठो, नयाँ गाली भए पुग्छ

Segments: 

Comments