नेपाली

No votes yet
को आउँछ मेरो गीत खोस्न / भीमदर्शन रोका

को आउँछ मेरो गीत खोस्न ?
एक्लै सफरमा मेरो मीत खोस्न,

सीमा नै टपिसकेको छु मैले,
को आउँछ मेरो जीत खोस्न ?

को आउँछ मेरो गीत खोस्न ?
एक्लै सफरमा मेरो मीत खोस्न ।

वर्तमान तिम्रो छ,
भविष्य मेरो होला,
को आउँछ मेरो अतीत खोस्न ?

को आउँछ मेरो गीत खोस्न ?
एक्लै सफरमा मेरो मीत खोस्न ।
No votes yet
कैयौं बाटोबाट आएको हुँ / भीमदर्शन रोका

कैयौँ बाटोबाट आएको हुँ
कैयौँ गीत गाएको हुँ
पर्वत बनी उभिएको हुँ
नदी नाला बनी आएको हुँ
कैयौँ बाटोबाट आएको हुँ ।

हुरी बनी दगुरन्छु म
छायाँ बनी बिसाएको हुँ
यौवन बनी ढल्कन्छु म
माया बनी आएको हुँ

कैयौँ बाटोबाटा आएको हुँ ।
Segments: 
No votes yet
तिम्रो जन्ममुहूर्त / भीमदर्शन रोका
No votes yet
हिमाल बोलाउँछ / भीमदर्शन रोका

प्रिय !
जाऊँ हिँड त्यो ठाउँमा
जहाँबाट छर्लङ्ग देखिन्छ हिमाल
र शुरु हुन्छ यसको सीमाना 
त्यहाँसम्म आई खोजिरहन्छ
तिमीलाई, मलाई र हामीजस्ता कैयौँ कैयौँलाई !

सङ्लो, सङ्लो
शुभ्र, स्निग्ध
बसिरहेको......... उठिरहेको
आफ्ना चुली आफै पार गरी गरी
सयौँ पर्वतसम्म गएको
ऐनैऐनाको स्निग्ध हेराइमा
बोलाउँछ
आफूले आफूलाई हेर्न
तिमीलाई, मलाई र हामीजस्ता कैयौँ कैयौँलाई !
Segments: 
No votes yet
चार टुक्रा / भीमदर्शन रोका

ताराहरुको आकाश बोलाउँछ मलाई,
यो कति टाढाको आश बोलाउँछ मलाई,
कहिल्यै पनि नफक्रिएको
कलि कलिको सुवास आउँछ मलाई ।

हृदयले आफूसँग राख्दछ मलाई,
बचपन बारबार छोई भाग्दछ मलाई,
जसलाई पनि हेर्दछु म
उसैले आई समात्छ मलाई ।

पिउँछु, पिउने मेरो बानी छ;
मस्त छु मग्न छु, बेहोसी मेरो कहानी छ; 
जो लुटिएका छन् आउनू नजिक मेरो 
कि जवान छु र जवानी छ ।
Segments: 
No votes yet
ढल्मल ढल्मल गरी / भीमदर्शन रोका

ढल्मल ढल्मल गरी
सेता सेता बादलसरी
मलाई आकाशतिर जान नदेऊ
मेरोआफ्नै धरती छाडी ।

कहिले प्रयास गरेँ भने पनि
उँचा उडान भरेँ भने पनि
तिमी मलाई हावाले हान्नू
पानी पार्नू, आसिना पार्नू

बिजुली–चुल्ठीले बाटो छेक्नू
तल मेरै धरतीमा फ्याँक्नू
ढल्मल ढल्मल गरी
आकाशतिर जान नदेऊ ।
No votes yet
डुङ्गा राखे जलमा तिमीले / भीमदर्शन रोका

डुङ्गा राखे जलमा तिमीले
हातको पतवार दिउँला ।

उत्थान—पतनको माझमा
तूफानको किनार दिउँला ।

डुङ्गा अढ्यो भने कतै
लहरको पर्दा उघार दिउँला ।

दाउ हान्न नै आए मसँग
आफ्नो सवकुछ हार दिउँला ।
Segments: 
No votes yet
एक्लै एक्लै उदास उदास छु म / भीमदर्शन रोका

एक्लै एक्लै उदास उदास छु म
घाम डुबी तारा नउदाएको आकाश हुँ म
हिजो जहाँ आई बसेथिन् तिनी
त्यही उजडिसकेको बास हुँ म

एक्लै एक्लै उदास उदास छु म ।

कोही नदी किनार हुँ म
सधैँ पर्खिरहने प्यार हुँ म
कतैदेखि टाढा भएपनि
कतैदेखि बिल्कुल पास छु म

एकलै एक्लै उदास उदास छु म ।
No votes yet
ए रात, ए दिन, रोक, रोक / भीमदर्शन रोका

भीडैभीडले छोपेको, देखिन्न बाहिर
यो कहाँ हो, आइपुगेँ कहाँनिर
यसले कता पुर्‍याउन लाग्यो
अघि देखेको ठाउँजस्तो लाग्यो
बाटो एकदम फरक लाग्यो
चक्रपथझैँ घुमिरहेको
ए रात, ए दिन, रोक ! रोक !
म यहीँ ओर्लन्छु
गल्तीले यसमा बसेछु
कुन सुरमा चढेछु ।

अलि ढिलो भयो
बिहान रित्तै गयो
रित्तै भए पनि पुगिसकेको होला
म भरिदिन्थेँ
म पुग्न आएको थिएँ
No votes yet
एक युग भयो / भीमदर्शन रोका

एक युग भयो, छाडेर घर
म यात्री गर्न एक्लै सफर
हिँडिरहेछु, साथी ! म हिँडिरहेछु
आरम्भ छाडी अन्तदेखि बेखर !

एक युग भयो...

सधैँ बिहान हिँड्न थाल्दछु म
सधैँ साँझ, ताराहरु बाल्दछु म
सधैँ दिनको एकै अन्त देख्दा
किन हो किन लाग्दछ डर ?

एक युग भयो...
Segments: 

Comments

Recent Comments

About Online Sahitya


Online Sahitya is an open digital library of Nepali Literature | Criticism, Essay, Ghazal, Haiku, Memoir, Personality, Muktak, News, Play, Poem, Preface, Song, Story, Translation & more

© Online Sahitya Digital Library, All rights reserved. Online Sahitya is a digital library dedicated to Nepali Art and Nepali Literature.
For further details contact: onlinesahitya@gmail.com.