सभ्यता / श्रीओम रोदन

No votes yet

"घर-आँगन सफा छैन, सडक, खेत त मलमुत्र त्याग गर्ने ठाउँ नै भइहाल्यो । जनस्वास्थ्यप्रति अलिकति पनि ध्यान दिन नसकेका गवाँरहरू "सहरमा नआइकन कसैले सभ्यता पनि नसिक्ने भए" तराईको एउटा गाउँबाट फर्किएपछि एनजीओ मास्टरले साथीहरूसँग कुरा गरे तर रिपोर्टमा भने गाउँमा स्वास्थ्यसम्बन्धी चेतना फैलाउन जागरण कार्यक्रम, गोष्ठी, सम्मेलन गर्नुपर्ने र केही अगुवाहरूलाई काठमाडौँको अवलोकन भ्रमण गराउनुपर्ने लेखे ।

रिपोर्टअनुसार विभिन्न कार्यक्रमको परिणाम सकारात्मक देखिन थाल्यो । केही अगुवाहरूलाई काठमाडौँको अवलोकन भ्रमणको लागि ल्याइयो । त्यही बेला नगरपालिकाका कर्मचारीहरूको हडताल चलिरहेको थियो । सडकमा थुप्रिएको फोहरले हिँड्नै नहुने गरी दुर्गन्धित भएको थियो । सडकबाट फोहर नउठाइए पनि सहरका सभ्य नागरिक भने घर सफा गर्न सडकको फोहरमाथि फोहर थुपार्दै थिए ।

सफाइ सम्बन्धी अवलोकन भ्रमणमा भएका केही अगुवाले देखेपछि एकले भने, "हामी पनि पहिले घर सफा गरेर सडक फोहर गथ्यौं तर सहरका सभ्य मानिसहरू अहिलेसम्म पनि त्यस्तै गर्दा रहेछन् ।" अर्कोले थप्यो - "हामीलाई सिकाउँदा सिकाउँदा यताकालाई सिकाउन नभ्याका होलान् ।"

फेरि अर्कोले थप्यो - "हामीले भन्दा यिनीहरूले पहिले सिकेका भएर बिर्सेका होलान् ।"

Segments: 

Comments

Recent Comments

About Online Sahitya


Online Sahitya is an open digital library of Nepali Literature | Criticism, Essay, Ghazal, Haiku, Memoir, Personality, Muktak, News, Play, Poem, Preface, Song, Story, Translation & more

© Online Sahitya Digital Library, All rights reserved. Online Sahitya is a digital library dedicated to Nepali Art and Nepali Literature.
For further details contact: onlinesahitya@gmail.com.