सगरमाथा चुली पनि चुरेजस्तो लाग्छ

-बुँद राना

सगरमाथा चुली पनि चुरेजस्तो लाग्छ ।
अगस्तीले सबै थोक तुरेजस्तो लाग्छ ।।

जागी सुख हुन्थ्यो कहाँ सुती सुख हुन्थ्यो ?
कानैनिर कुम्भकर्ण घुरेजस्तो लाग्छ !

ढल्यो भन्ने रात झनै झाँगिएझैँ देख्छु ।
उदाउँदो घाम भने लुरेजस्तो लाग्छ ।।

बिहानीको पखाईमा सधैँ साँझ पर्छ
बिहानी चैँ कुहिराले पुरेजस्तो लाग्छ ।।

बाघ मार्‍यौँ भनी के को मख्ख पर्नुछ र ?
ब्वाँसोलाई गाई बाख्रा जुरेजस्तो लाग्छ !

गुलाफको, गुराँसको लेख्न तम्सिएको
गजल त विद्रोहको फुरेजस्तो लाग्छ ।।

हिजो आएको आँधीले फोहर थुपारे छ
मुलुकले अर्को आँधी कुरेजस्तो लाग्छ ।।

Segments: 
Author: 

Comments

Online Sahitya is an open digital library of Nepali Literature | Criticism, Essay, Ghazal, Haiku, Memoir, Personality, Muktak, News, Play, Poem, Preface, Song, Story, Translation & more

Partners

psychotherapy in kathmandu nepal elearning nepal Media For Freedom