Loading

हराएछु भन्नेकुरा जब थाहा पाइएला / मनु ब्राजाकी

हराएछु भन्नेकुरा जब थाहा पाइएला
आफूलाई खोज्न अब ऐना यौटा चाहिएला ।

घरमा बसी कर्म गर्दा-गर्दा दिक्क भइएछ
मन्दिरमा बसेपछि धर्म गर्न भ्याइएला।

बिरोधीका कुरासुन्दा आफ्नो ठाउँ थाहा भयो
समर्थकका कुरा मान्दा गालीमात्र खाइएला ।

रिन खोज्न जानुपर्ने अरुको नै घर घरै
खाली हात भए पनि घर फर्की आइएला ।

लोकगीत, शोकगीत, भोकगीत गाइँदैन
देशभक्त हुन अब पपगीत गाइएला ।

Segments: 
Author: 

Comments