चराको व्यथा / विप्लब प्रतीक

Author

राति हुचीलले तर्साउँछ
दिनमा मान्छेहरुले 
यो कस्तो रुप धरे 
अचेल मान्छेहरुले ? 
 
उहिले उहिले हामी 
खटप्वालमा गुँड लगाउँथ्यौँ
अचेल प्वालै नहुने घर 
बनाए मान्छेहरुले । यो कस्तो रुप धरे अचेल मान्छेहरुले ?
 
पहिलेका बच्चाहरु 
लुकेर गुलेली बोक्थे
अचेल जन्मैमा बन्दुक उपहार
दिन्छन् मान्छेहरुले । यो कस्तो रुप धरे अचेल मान्छेहरुले ?
 
के गर्नु हजुर यो कलिमा 
कनिका पाइनै छाड्यो
आँगन भए छर्थे कनिका
बरा मान्छेहरुले । यो कस्तो रुप धरे अचेल मान्छेहरुले ?
 
अब त धान खान पनि 
देश चहार्नु पर्छ
कठै घर रोपेका खेतमा
गरीब मान्छेहरुले । यो कस्तो रुप धरे अचेल मान्छेहरुले ?

Segments